Barnabækur í sýndarveruleika (Aprílgabb)
Við hjá Study Cake höfum alltaf stefnt að því að halda þróun barnabóka í takt við það sem má finnast á öðrum sviðum mannlegrar sköpunar. Í dag kynnum við stoltir til sögunnar næsta skref okkar í þeirri þróun.
Enginn vafi liggur á því að sýndarveruleiki í einu formi eða öðru mun hafa ólýsanleg áhrif á það hvernig við mennirnir upplifum skemmtun á næstu árum og áratugum. Bíómyndir, tölvuleikir og önnur form skemmtunar munu gjörbyltast og höfundar, leikstjórar og forritarar fá glænýtt leiksvið til þess að tjá sköpunargáfu sína og koma hugmyndum sínum á framfæri.
Bókin er eitt elsta og merkilegasta tjáningarform mannsins og hefur spilað lykilhlutverk í þeirri þróun sem hefur hingað til einkennt vegferð mannkyns. Sama hvort talað er um Frönsku Byltinguna eða Rómarveldi á tímum Markúsar Árelíusar, þá er sameiginleg þekking forfeðra okkar að mestu leiti fólgin í þeim ritum sem þeir skildu eftir sig.
Þó er það öllum mönnum augljóst að bókin hefur í sjálfu sér lítið þróast á þessum tíma. Kynntar hafa verið smávægilegar nýjungar á borð við raf- og hljóðbækur en upplifunin er enn að mestu leiti sú sama og hún var þegar fyrsta orðið var ritað á sléttum Mesópótamíu.
… en ekki lengur. Við hjá Study Cake höfum unnið hörðum höndum að því að bjóða notendum okkar upp á lestur í sýndarveruleika. Börn á öllum aldri munu geta lifað sig inn í lesturinn eins og aldrei áður og í framhaldinu svarað skemmtilegum spurningum um bækurnar, lífið og tilveruna.
Hægt verður að tengjast uppáhalds sögupersónunum sínum á persónulegan og náin hátt og jafnvel verður í ákveðnum bókaflokkum hægt að hafa áhrif á framvindu sögunnar.
Við reiknum með því að sá tími sem krakkar eyða í lesturinn muni stóraukast þegar þau sækja Study Cake VR með Oculus eða Samsung sýndarveruleikagræjunum sínum. Bækurnar verða aðgengilegar á sama verði og úti í bókabúð en upplifunin er allt önnur.
Eftirspurnin gífurleg
Nú hefur þróunin átt sér stað í yfir þrjá mánuði og hefur á þeim tíma fjöldinn allur af fjölskyldum prufað hugbúnaðinn. Nánast undantekningarlaust hefur spenningur barnanna verið það mikill að foreldrar hafa strax sett sig á biðlistann, en leikurinn kemur út á sama tíma og hægt verður að kaupa sýndarveruleikagleraugu í hefðbundnum raftækjaverslunum á Íslandi.
“Við erum handvissir um að þetta sé framtíð barnabókanna og að heitasta jólagjöfin árið 2016 verði 6 mánaða áskrift að Study Cake VR.” -Kjartan Þórisson, framkvæmdarstjóri Study Cake.
Ísland er frægt fyrir þáttöku sína í þróun hugbúnaðar á sviði sýndarveruleika, en dæmi um önnur slík íslensk fyrirtæki eru Mure VR, Sólfar, CCP og núna Study Cake.
